Telugu Poem No Religion Poem by Srininivas Reddy Paaruvella

గుళ్ళు
మసీదులు
చర్చీలు
తిరుగుతున్నావు
నువ్వు తెలుసుకుంటున్నదేందోగాని
అక్కడ మాత్రమే దేవుడున్నాడనే అబద్దాన్ని
గట్టిగా చెప్తున్నావు

నా మతమేపవిత్రమని
నా మత గ్రంథమే పవిత్రమని
నా మత భక్తులే పవిత్రులని
నా అభిమతమే నిజమనే విషవాయువుతో
స్వచ్ఛమైన గాలిని కలుషితం చేస్తున్నావు

మట్టి మీదేనిలబడగలవని
కడుపు నింపేది మట్టి మాత్రమేనని
ఉపిరి ఉన్నంత వరకు ఊడిగం చేసేది మట్టేనని
ఉపిరి వదిలినా దేహం మీద మట్టే సంతకం చేస్తుందని
మరిచిపోతుంటావు

దేశమంటే మట్టి కాదు మనుషులే, కాదన్నదెవరు! ?
మనుషులు
మతాన్ని కప్పుకొని తిరుగుతున్నందుకేబాధ
దేశం దేవాలయమని
రాజ్యాంగం పవిత్ర గ్రంథమని
అనుకోవడం పెద్ద కష్టమేమి కాదు, మనసున్నందుకు

పారువెల్ల
14-04-2019