கழுகு பார்வை Poem by Saravanan Sivasubramanian

எங்கோ
ஒரு கிராமத்தில்
சுடுகாட்டில்
ஒரு பெண்ணின் பிணம்
எரிந்து கொண்டு இருக்கிறது

அந்த சிறு தேசத்தின்
உள்நாட்டு போரில்
ஒரு இளம் பெண்
ஆதிக்கவெறி ராணுவத்தால்
முழு நிர்வாணம் ஆக்கப்படுகிறாள்


ஒரு பெரிய நகரத்தின்
அடுக்கு மாடி குடியிருப்பில்
புது மணப்பெண் ஒருத்தி
கணவனின் கால்களில்
விழுகிறாள்
அவள் ஏதோ பேச ஆரம்பிக்கிறாள்
அவன் அவளின் வாயை
தன் கைகளால் மூடி விட்டு
அவளை கட்டிலில் கிடத்தி புணர ஆரம்பிக்கிறான்

அந்த நெரிசலான நகரத்தில்
பரபரப்பான சாலையில்
ஒரு ஆமை போல்
நகரும் பேரூந்தின் உள்ளே
ஒரு இளம் பெண்ணை ஒரு
காமுகன் இடித்து கொண்டு இருந்தான்

எங்கோ
ஒரு கிராமத்தில்
சுடுகாட்டில்
ஒரு இளம் பெண்ணின் பிணம்
எரிந்து கொண்டு இருக்கிறது