Rutang Bana Ditaola... Poem by Kitso Mafora

Ka dinako tše dingwe, re ka fela re fegelwa goba re tlalelana ge re bona bana ba rena ba se na kgahlego mo mmolelong wa rena wa Sepedi. Ke therešo gore go ile gwa ba le tšhitišo e kgolo bakeng sa gore polelo ya rena, kudu kudu direto, e golofale ge go e tla tabeng ya go phatlalatšwa le go gola ga yona. Fela yeo ga se ya swanela go ba kgwekgwe ya taba.

Naa ba bina noko ba ga Mogoboya ga ba fele ba re: 'Mmala wa kgomo o gola namaneng? ' BoMashao wa Madiba a Letswalo la Mmatau Hlahla, bona ge ba ruma ditaba, naa ga ba re 'mo hlako ya tsogo e gatilego le ya koto e a gata? ' Gona se se ra gore thari e tshesane e ka se be yona feela yeo e itšhatšharelago ke moretlwa kganyeng ya go se bontšhe kgahlego tabeng ya go ithuta mmolelo, direto le setlogo sa bona sa Sepedi. Potšišo ke gore, bohlogo-tšhweu bona ya bona tema naa ba a e kgatha?

Bao ba tsebago ditaba ba fela ba re: 'Tšhiwana ya hloka moditi, molao e o tšea ka tsebe'. Se se bolela gore ka gore pelo ge e rera molato ga e lale, le rena bao re nago le lehutšo la go lokiša moo re fahlilwego, re ka lebelela ditšong le ditlogong tše dingwe go bona gore re šaeditše ge re etla kae, gomme re leke go lokiša.

Ka mohlala, nageng ya Gerika yeo e ikepetšego gare ga lefase kgojana le lefase le la rena, lerumo la thuto le loutšeditšwe go thuša mofsa go ba modudi wa naga o mo kaone. Seterekeng sa Sparta, bašimanyana ba be ba aroganywa le batswadi ba bona ba ena le mengwaga e šupago feela, gomme ba latswa ka mollo wa thuto ya segagabo bona go fihla ba gwagwalala seka legong la mohwelere mengwageng ya bona ya bo masome-tharo. Nakong ya ge ba aloga, thuto e tla ba e metše mo go bona. Anthe kua Athene, bana ba be ba kolobetšwa ka dipuku tša direto tšeo ba swanetšego go di swara ka hlogo go tloga mengwageng e seletšego feela. Se se bontšha gore batswadi bao ba hlokometše gore thupa e kobja e sa le meetse. Ba leka ka mešego yohle go sediša fotwane tša bona le go hlokomela lefa la bona la thuto...

Fela ya rena naga… Ruri e gana go dula ka a mabedi marago. Tša 'mahlaku a mafsa a ema ka a 'tala' ruri di tšwile ka monga wa seloko. Go phelwa ka la modimo nthuše. Pele le morago ke gona moo thaka e tshesane e sa go lemogego. Mola bontši bja hlogo-tšhweu bo se sa ikemišeditše go nyetlela masogana le makgarebe tša ngwaga wa mpo le tšhikidi. Ba tla itia kati bjang go se na yo a ba rutago yona? Ba tla hlakela le go letša mekgolokwane bjang go se na yo a ba etellago pele?

Ruri Morena LP Thoka o be a opile kgomo lenaka, re hlokomologile maikarabelo a rena a go ruta malapa a rena. Ga re sa re selo ka go raloka karolo ya rena ya go ba bahlahli. Theetša gore yena ge a etshwa ditemana-theto a reng…

La pitšana - LP Thoka

Ge e le lehu re hwile la pitšana
Gobane la sego lona le ka rokwa,
Afrika-Borwa ruri e tsenetšwe ke sera,
Boramaledu ba iphetošitše dipoo tša marurušo
Ba iphetošitše mekoko ruri ba a kopa,
Ba iphetošitše dikgotho ruri ba a kgotha,
Ba itirela boithatelo ka bana le basadi,
Ba šomiša mmušo wa mokoko,
Ke bo sekopa le matswiana,
Matheka ba ithinyolla ka digotlane tša ditlolamelora,
Bangwe merogo ba ikgela diphoofolong,
Ba re ba fodiša tšhitadingaka ka madimahlweka.

Thuto ye ya ka mo godimo e re lemoša eng? Ngwana'ngaka ekwa legare, tatago o fela a tsapunya batho ka lona… A re lokišeng batia! Mpša ya motsomi ga e lale fase.