नोंसोरनि थाखायनोथ' आंनि जोनोम Poem by Ronjoy Brahma

मोननाय आरो खोमानांनाय बेथ' जिउनिनो बाहागो
बेनि थाखाय दलर जिरायनानै गाबना सम बारहोनो मानो
सानफ्रोमबो गोदान सानफोरा फैदों आरो थांफिनगासिनो दं
बेजोंनो दान्दिसे रंजाफानांगोन

आं दैमायाव गोजावनाय बिलाइ गोरान नङा
हाब्रांनिफ्राइ गुगालांनाय बैसो बारनाय बंफां नङा
आं गावनो अराय बोहैबाय थानाय गंसे दैमा
दैमा जानानैनो बोहैलांबाय थागोन
लैथो आरो लैथोमायाव सहैनायानो आंनि थांखि

सोरबा आंनि गोरबोआव अननाय नागिरफैदों
अननायनि आंखाल जानाय सुबुंफोरनो अननाय होदों आं
सोरबा आंनि गोसोआव दाखोर फोजावहरदों
गासैखौबो आं फोजावलांबाय थादों
आरो बबेबा हाब्रांआव दोनबोदों

आंनि थांखिया सोरखौबा सोगाबनाय नङा
आंनि थांखिया सोरखौबा जंखायनाय नङा
आंनि थांखिया नोंसोरनि गोनांथि बादियै अराय बोहैबाय थानाय
सोरनि थाखाय थांनानै थानो
नोंसोरनि थाखायनोथ' आंनि जोनोम