Phošo Tšaka (Sepedi) Poem by Kitso Mafora

Phošo ya ka, ke yona!

Seipone sa bohlale se ntšweletša nyanyeng —
Ke leihlo la Ngwedi, le ntlhoma ka lešata la kgopolo,
Ga se sefahlego, ke moriti wa kgopolo ya Moditi wa Marumo,
Seswantšho seo se ntšhitšego lerapo le le šilafatšego kgopolong—
Ditoro tša lehodu, tše di thuthupago bjalo ka serurubele se se lahlegago lehlabula,
Tšeo ka nako ye nngwe di phadimago bjalo ka naledi ya masa yeo e ralalago serokolo,
Efela di timelela pele ga letšatši le rotoga.

Ke fišwa ke molato,
Ke ralaletšwe ke mahlaku a ditlhong,
Pelo ya ka e phuphurilwe ke letata la diphošo,
Ke lahlegile ka gare ga leru la selepe sa legodimo,
Tšhwarelo e nkgopotše, e nkopa ka lentšu la Mokoma wa Mmadishakga,
E nkimela lešokeng la Ga-Chuene moo meokgo e dulago e thuthupa godimo ga leswika.

Botshepegi bja ka —
Bjo ke bo gopolago bjalo ka 'Mmatsoku, kgomo ya kgopolo ye e sa jego lefela la go sonya,
Bo tšwa ka go nanya, nanya ya ba ba sa tšhabeng sešula sa diphiri,
Bo felelela godimo ga-ka boka kgudi mesong, bo nnyaka bjalo ka lentswe la mmamotse molaleng.

Efela mmu o a hlabjwa go be go mele,
Mo lebitleng la diphošo go mela lehlomela la kgotlelelo,
Moya o a foka, o tliša lešata la pshikologanyo — ke bokamoso.
Tšhwarelo e seke ya ba marope, e be mosela wa kgomo seboka-ntšhi,
Tšhupo ya tswalo ya bobedi — sefela sa moya se opelwa legodimong.

Efela legodimo le ge le le kgole ga le kgakala — le kgona go theoša pula ya pholo!

Phošo Tšaka...
Tšhwarelo hle, ka phošo tšaka.