O Sepetše Ka Setu! Poem by Kitso Mafora

O ile o homotše bjalo ka mmutla wa mošate,
Wa tšwa ntle le lešata, wa sepela bjalo ka phefo ya masa.
Lebati ga lea tleruma, moya ga se wa foka,
Ke šetše ke le noši—setung sa lešata la masetlapelo.
‘Šata bjašeng bja mong'noši,
Šata la kgano e hwile e se ya belegwa, kgole e kgaotše ya sesa tlama.

Ke go nyakile mohlala dilong tše o di tlogetšego,
Seaparong sa gago se nkgago bjalo ka dinaledi tša maloba, Dipolelwaneng tša'go tše hlohlago kgopolo.
‘Fela nako ke nkgwete—e ja tša maloba le maabane e sa bolele selo,
Ga e kwele maikwelo bohloko bjalo ka ledimo le tšutlago go tšwa bohlabela.
Nka ipha ngwaga tše sekete, ke gafe mo lefaseng,
Gore ke kwe lentšwana la gago—Le ntokolla lere: 'Šala gabotse moratuwa...'

Bophelo ke mogoma wa metse—bo a tla, bo a sepela,
Re thekga lethabo bjalo ka meetse ka mogopolo.
Bo fofa bjalo ka lerumo la moya, gwa se šale selo.
Rea aga, gwa phušuga, re šale re swere marope diatleng.
Fela lerumo la pelo yaka go ya go ile,
Ga se gore o ile — ke gore o ile o se wa phadimiša ‘fahlego saka ka la gore: 'šala gabotse...'.

Bjale ke eme mo bjalo ka mohlala lešabašabeng,
Ke swere meokgo ya matloro-tloro pelong yaka,
Kgopolo e senya kobo ka mosepelo wa lehutšo la gore o be kgauswi le nna,
Fela thorwana ya gona ga bjale ke mphoka,
Lesedi pelong yaka le tima bjalo ka kerese gare ga mpa ya bošego —
Ga bjale bjaka bophelo bo fetoga tiro ya ma-ntšha o tlogele.