Mogatuse Le Makete! (By Ngoke Kabelo Mafora) Poem by Kitso Mafora

Le dira gore sediba sa dihlogo putswa se seloge meetse a go toka mola dipelo tšona di dikeletše kgole di ile maroba' pelo,
Ka ge hlako tša Mogatusi-a-Mogatusi di wele makgolela, di wele mpherefere.

Ge e le Mosale-a-Banareng le Ngoke Yena Nkosana, ba šala ba itshwere diledu,
Maledu a Ngoke a šala a hlafile boka boya bja phukubje setšwa moleteng ka sa nthago.

Ge e le Ngoke yena ke mogale yo a lwago ka marumo mabedi,
Ka go la go ja o swere lerumo, yena Mogatusi, yo a rego ge a gata fase gwa tšwa meetse.

Mola ka go la molema e le yena Makete maimela baloyi, nare-e-ntsho sephetla bagale melala.
Ke yena ketapele-a-mathekga-koloi, rumo la gagwe ge le tšwele ga le boe feela.

Ke ikgantšha ka lena barwa'ke.

Le etša seala sekgabiša hlogo go mogatša'ke yena Mankwana, yo a rego ge a sega, yaka go a sa!
Gomme lekepekepe lona la galagala boka legadima letšwa bohlabatšatši bokhutong bja Banareng ba Ga-Letsoalo ga Mamahlola.

Le gadimela bolala tshehla ya godimo, go yo bonešetša nare-e-kgolo, yena Lefolosa, ke bolela ka Ramatsuoloko,
E rego ge e hwetša tshehla tša legola di sena seboka, ya di rakediša, ya di rakediša tša tšhaba di dutile mesela mola maoto a elela ditšwa mmele.