Lethabo La Ramogolo Poem by Kitso Mafora

Pelo ye mpsha e hlabile mokgoši phefong,
Ka ge ngwana e le tšhilo ya lapa,
Moya o a re hlalošetša, gore bophelo bo tšwela pele...
Ge e le Ramogolo yena, o fetogile Maitia-kati ge a thula pelo maroba!


Leeto la banna-tia le thoma ka bogale,
Monna ke nku — o llelwa ke manku!
O eme Nong kgolo ka morago ga go nyaoga pelo, wa šoma, wa aga bokamoso,
Wa ba sedulo sa lerato le tshwanelo.


Re letetše maoto a manyenyane go re utswa dipelo
Ka nnete Ngwana ga a hlabje!
O tla tliša lekekekee, ditšhegofatšo, le lesedi la mesong,
Seetša sa letšatši sa go swantšha hlabologo ka lapeng.


Setlogolo ke seripa sa tšona!
Lethabo le tla ka matsogo a mabedi,
Re tla le kuka, re sega ka meokgo ya lethabo,
Ka ge yo Godimo-dimo a re thoba dipelo ka peu e mphsa!


Ka dipelo tše di bulegilego, re re:
Mahlako a lapa a oketšega!
Re amogela naledi ya lena ya bošego ba ga Nong,
Leina la lena a le tšwele pele.