Kusasa Kuyitolo Poem by Phumlani Vimbelasizwe Shiba

Ndvodzana,
Ye ndvodzana hlala phansi ngikudvonse ngendlebe
Kukubona ukhulile mine kuyangitfokotisa
Wena ungumliba loya phambili,
Hhayi bulima lobuya phambili
Ungisite ke fana lami uhloniphe wonkhe umuntfu,
Kusukela kulomncane kuya kulomdzala
Vani ngami ngikuyala ngimdzala
Ungagcili kakhulu etintfweni letindzala
Ufundze kwendlulisa tonkhe tintfo
Uphindze ukwati kumelana nato tonkhe timo
Ungavumeli limuva lakho licagele likusasa lemphilo yakho,
Kodvwa usebentise lona kuhlela likusasa lakho
Kuhlala edvolweni uncuse lomdzala wetinsuku,
Ngiko kanye lokuyokuphumelelisa
Ndvodzana alifi umnikati walo asaphila
Ungakulibali kutsi lisontfo liyagicika
Kutsi itolo wehlulekile akusho kutsi nakusasa utokwehluleka
Itolo bengiyinhlekisa bantfu bangibukela phansi,
Kodvwa namuhla batenta labanitsandza kwangatsi banibutsa phansi
Ndvodzana mine angisiso sifundziswa
Kodvwa kusami sibeletfo tiphumile tifundziswa
Indvodza ayilali kuze kushone lilanga
Kodvwa iyetama kuze kushone lilanga,
Ngibonga imakethe yami kutsi ikhone kunitfumela eskolweni,
Kutsi uyolayida sibane sakho sanguna phakadze
Ngoba bontaba kayikhonjwa bebatsi ngiyobhodla indlala inguna phakadze
Befike bayigceke yami imakethe bagijimele etitolo letinkhulu
Kodvwa ndvodzana kubeketela kudala imphumelelo
Sebenta njengesigcili kuze uphilise kwenkhosi
Hamba ke ndvodzana