Kasakit Batok Paglaom Poem by bonifacio alba

KASAKIT BATOK PAGLAOM
Ang kasingkasing nga masulob-on
Sama sa kangitngit sa kagabhion;
Nga maka babag sa paglantaw
Aron lantawon ang kaanindot
Sa palibot ning walog sa kinabuhi!

Apan adunay nagkidlap nga kahayag
Sa naglugitom nga kangitngit;
Nga mag banwag sa pag aginod
Uban sa mga hadla sa panahon
Nga mao ang nag pahiping paglaom.

Paglaom ang bugtong manluluwas
Sa mga na bilanggo sa mga kasakit
Nga bisan luyo nianang kangitngit;
Maghatag ug kahayag ning
kinabuhi!