Ipetle Makete… Poem by Kitso Mafora

Hlakana-sono ya pelo le kgopolo ga e na leeto,
‘Thaba di tla inama ge di fišwa ke maikemišetšo'ago.
Dibetlwa di betlwa bathong wa papa…
Kgokgomothi ge e betla e betlela go ja.
Nako ke leswena morw'a-mokgalabje
Kodumela wa-rra, šoma, ithute, gape lona ga le tšwe kgaufsi.

Ka ge modikologa o eja namane ya pholwana, tšea kgato ka šedi,
Boifa go senya kobo ka mosepelo.
Gopola gore khudu ya marega e tsebja ke mmei wa yona
Le ge meetse a tsena moeng, a phatlolla lebotho,
'Go sepela ka mogopo ke ga wona.'
Eba bjalo ka meetse samma, ikgafe, feto-fetoga le maemo, ragela maswiswi ntlong!

Hee wena nare-e-ntsho sephetla bagale melala
O morw'a Mosale-a-Banareng, le Ngoke-Nkosana.
'Gopola gore Mahlomola a fetwa ke lethabo.'
Nnete e sepela ka khutšo, e sego ka pefelo.
Ngwan'a phoša-dira a ka se tsoge a bolailwe, ka ge bohlale ke lebadi
Dihlare ga di epiwe moleteng o tee Morw'a-rre!

Ba re 'Tšhiwana ya hloka moditi, molao e o tšea ka tsebe',
Hloma mohlale ka dipotšišo, go se botšiše ke bogaswi bjo sa felego.
'Yo a sa botšišego o hlaelwa ke tsebo.'
Epa sediba pele meetse a fela,
Šoma bjalo ka ge eka o ntweng.
Tšeela pele e a thuša, gape go tloga ka madi ga go botse.

'Ka ge gauta e le tšhila ya nako.'
Nako yeo e fetilego e ka se rekege gape.
'Taamane ya diphošo e phala leswika leo le senago bosodi.'
Le ge o gata ka boya, Ipeele mo lešokeng la bophelo
'Monna ke seipone sa gagwe.'
Moremogolo go betlwa wa taola, wa motho, o a ipetla Monareng.