Etetša Serathana Poem by Kitso Mafora

Batswadi baka, Finkie le Fora, ke le thulela pelo maroba ka sereto sa lerato!
Le etilwe pele ke ditšhegofatšo tša yo Godimo-dimo.
Le ntlhamile ka diatla tša bopelo-telele,
La nthuša go lora, go ema ka maoto le go sepela…

Kgotse, kera lena papa, mantšu a lena a dula e le a bohlale le a maatla,
Le swana le lebone le le bonešago le lewatleng ge go ena le ledimo.
Le šoma ka mafolofolo ntle le pelaelo le botšofading bja lena,
Mogale wa ka yo a humilego ka dikeletšo tše se nago le dihlong.

Finkie, kera lena mma, pelo ya lena e swana le moropa wa boikgafo,
Moropa wo llago ka lerato letšatši le letšatši.
Le nthutile bophelo, la nkgokarela ka maatla,
Le naledi yaka yeo e sa timego borokong bja bošego.

Mmogo, le thomile lapa le lefsa la Kabelo le Mankwana,
La hlaba tlou ka dilokwe gore le re šireletša, la re bofa ka bohlale le lerato.
La re beela mohlala o mobotse wa boineelo bja Bo-Modimo,
La fa ditoro tša rena maphego go tloga bjaneng.

Le ile la fulela thabeng gore re kgone go phadima le go atlega,
Ntle le go tsoma moputso, la galoga dinao le bala dinaledi ka baka la rena.
La re ntšhetša bophelo bja lena ka botlalo,
La re ruta gore: "Sekutu sa Kgomo se Arwa ke Mong wa Sona".

Bjale, ke le fa pelo ya ka seretong se,
Le ge ke le yo moso-moso, pelo yaka ke e šweu-šweu ka lena.
Ke le rwala mo pelong yaka ka mehla le mehla,
Batswadi baka, Mma le Papa, ke ntšha pelo nhla ka lena...