Besithi Ndiyaboniswa Poem by Anele Potelwa (Unpublished)

Babe nyubuka besineka beqhayisa ngezisini,
Ilunxilo lesigezo bexhesheka kufuphi nobubi,
Beqinis'ifokotho bexhomile ngoxhongo,
Bexhuzula isigezo,
Ndandingumxhaka ndiluthuth'olivuthelwayo,
Ndingenaw'amava,
Ndingenaz'iimbono,
Ndingenal'ulonwabo,
Ndiswel'inkuthazo kwabandithandayo,
Ewe Ndiswele ubomi nendl'ekhanyayo,

Ndikhubeka nje bona bavutyiselwe emagini,
''Qubul'umqokozo nto kaZizi uthathise''
Ndandiman'ukutsho ndizikhuthaza,
yayinga ndiphil'obetakane elineentsuku,
Bemanxada-nxada bengqisha

bephokoz'ameva kwindlela endiyihambayo,
Yasisicaka kwakhona eyam intliziyo zezontlungu,
Yalihlwempu eyam ingqondo xeshikweni ndihlatya ngameva,
Zaziman'ukwehla iinyembezi,

Beza betyhalwa yimimoya bexakekil'ookhetshe,
Ngokuzingca bexhwithana ngam
okwenyam'esithethe sakwaBhaca gxebe! Ugcubhe
Yayingulombhodamo
ngqondo yam gcembe ekuphileni,
Ntliziyo yam ekuqabukeni,

Akhala amagubu elandelwa ngamaxilongo,
Yayinga ndingema ndingqishe,
kodwa lwalungandifanele ulonwabo,
Zehla iinyembezi,
kwashiyeka umzobo oqulethe amava.